صوبیں دا ہکو سواں موقف اے سامان پجاونڑ کیتے پورے ملک اچ گڈز ٹرانسپورٹ دی اجازت، مسافر بردار گاڈیاں تے پابندی برقرار رہسی ،وزیراعظم عمران خان
اسلام آباد ۔ 27 مارچ (اے پی پی)وزیراعظم عمران خان کورونا وائرس دے تناظر اچ عوام کوں سہولتاں ڈیونڑ کیتے وزیراعظم کورونا ریلیف ٹائیگرز فورس بنڑاونڑ تے خصوصی فنڈز قائم کرنڑ دا اعلان کریندے ہوئیں آکھیے جو کورونا دے خلاف جنگ قوم ہک مٹھ تھی تے جت ویسی، صوبیں دا ہکو سواںموقف اے جو سامان دی نقل و حمل کیتے آزاد کشمیر، گلگت بلتستان سمیت پورے ملک اچ گڈز ٹرانسپورٹ دی مکمل اجازت ہو سی جڈاں جو مسافر بردار گاڈیاں تے پابندی برقرار رہسی۔ اے گال انہاں جمعے کوں اتھاں میڈیا پرسنز نال گال مہاڑ کریندے ہوئیں آکھی اے ۔ ایں موقع تے وفاقی وزیر منصوبہ بندی و ترقی اسد عمر، وفاقی وزیر اقتصادی امور حماد اظہر، وفاقی وزیر تحفظ خوراک و تحقیق خسرو بختیار، وزیراعظم دی معاون خصوصی اطلاعات و نشریات ڈاکٹر فردوس عاشق اعوان، وزیراعظم دے معاون خصوصی صحت ڈاکٹر ظفر مرزا، وزیراعظم دے معاون خصوصی امور نوجوانان عثمان ڈار اتے نیشنل ڈیزاسٹر مینجمنٹ اتھارٹی دے چیئرمین لیفٹیننٹ جنرل محمد افضل وی موجود ہن۔ وزیراعظم عمران خان آکھیے جو کورونا دے خلاف جنگ قوم ہک مٹھ تھی تے جت ویسی ، امریکہ اپنڑی معیشت اتے عوام کیتے 2 ہزار ارب ڈالر دا پیکیج ڈتے ۔ انہاں آکھیے جو پورے لاک ڈاﺅن دی صورت اچ بہوںغریب طبقے دی فکر ہئی ، سامان پجاونڑ کیتے گڈز ٹرانسپورٹ دی پوری اجازت ہوسی، آزاد کشمیر، گلگت بلتستان سمیت پورے ملک اچ گڈز ٹرانسپورٹ چلدی رہ ویسی، فیصلہ ملک اچ کھاونڑ پیونڑ دیاں چیزاں دی کمی دے تدراک کیتا گے ، مسافر بردار گاڈیاں تے پابندی برقرار رہسی۔ وزیراعظم عمران خان آکھیے جو ملک اچ ڈو ہفتے دے بعد کورونا وباءدی کیا صورت ہوسی ، وثوق توں کجھ نی آکھ سگدے ۔ انہاں آکھیے جو چین اچ لاک ڈاﺅن دے دوران شہریاں کوں گھر تے کھانڑاںپجایا گئے۔ وزیراعظم آکھیے جو وباءنال نبڑنڑ کیتے نینگراں تے مشتمل رضا کار فورس بنڑیندے پیوں ، 31 مارچ کوں وزیراعظم کورونا ریلیف ٹائیگرز فورس دا اعلان کیتا ویسی، ضرورت پئی تاں نینگر ، رضاکاراں دے ذریعے متاثرین دے گھراں تے کھانڑاں پجیسوں ۔انہاں آکھیے جو کورونا وباءنال نبڑنڑ کیتے خصوصی فنڈز قائم کیتا ویسی ، پاکستانی عوام خیراتی اتے رفاحی کماں اچ ودھ چڑھ تے حصہ گھندن ، سمندر پار پاکستانیاں دی صلاحیت تے پورا بھروسہ اے ۔ انہاں آکھیے جو سٹیٹ بینک اچ خصوصی اکاﺅنٹ کھولیسوں جتھاں اوورسیز پاکستانی فنڈز جمع کرا سگسن۔ انہاں آکھیے جو پولیس کوں اکھیساں جو لاک ڈاﺅن دی خلاف ورزی تے گرفتار کیتے گے لوکاںکوںچھوڑ ڈیون۔ وفاقی وزیر تحفظ خوراک و تحقیق مخدوم خسرو بختیار آکھیے جو اٹے دی ودھ خریداری پاروں کجھ علاقیں اچ کمی تھئی اے ، کنڑنک دی سرکاری خریداری وی شروع تھی چکی اے ۔ فلور ملز نال طے پاتے جو او کنڑنک توں 60 دی بجائے 80 فیصد اٹا بنڑیسن۔ وزیراعظم دے معاون خصوصی ڈاکٹر ظفر مرزا آکھیے جو 5 اپریل تئیں کورونا توں متاثرہ مریضاں دی ڈیکھ بھال کرنڑ آلے طبی عملے کوںحفاظتی سامان مل ویسی ، آئی سی یو اچ کم کرنڑ آلے طبی عملے کوں وی تربیت ڈیسوں۔انہاں آکھیے جو پاکستان اچ کورونا وائرس دے 61 فیصد مریضاں دیاں عمراں 21 توں 50 سال اے، ایں صورت حال دا جائزہ گھندے پیوں جو پاکستان اچ کرونا توں متاثرہ لوکاں دی تعداد ڈوجھے ملکاں دے مقابلے اچ بہوں گھٹ اے ۔ وفاقی وزیر منصوبہ بندی و ترقی اسد عمر آکھیے جو لوکاں دی نقل و حرکت محدود کرنڑ دا فائدہ اوں ویلھے تھیسی جڈاں انہاں کوں ضروری چیزاں سوکھیں ملسن۔ انہاں آکھیے جو ضروری چیزاں دی فہرست بنڑا تے انہاں دی بلاتعطل فراہمی یقینی بنڑاونڑ کیتے طریقہ کار وضع کیتا ویسی ۔
وزیراعظم عمران خان دا عوام کوں سہولتاں ڈیونڑ کیتے وزیراعظم کورونا ریلیف ٹائیگرز فورس بنڑاونڑ ،خصوصی فنڈ قائم کرنڑ دا اعلان
صوبیں دا ہکو سواں موقف اے سامان پجاونڑ کیتے پورے ملک اچ گڈز ٹرانسپورٹ دی اجازت، مسافر بردار گاڈیاں تے پابندی برقرار رہسی ،وزیراعظم...
مضمون کا ماخذ : Aztec خزانے
.jpg)
